الخميس، 21 أغسطس 2008

وهوا ده حل المشاكل كلها ؟ ؟


فى البداية احب اقول السلام عليكم

فى الحقيقة انى لقيت بعض المدونين بيقولولى انتا مش هاتقدر تكمل كتابة فى المدونة دى

وانى اخترت طريق صعب ومش هاقدر اكتب فيه

وانى مش هالاقى كلام اكتبه بعد كده

مش عارف انا اللى بيقول كده ده قرأ اول بوست ليا ولا لا

عموما هوا بعنوان ايه حكاية الدنيا


خلينا ندخل فى موضوع النهارده وهوا طبعا متأخر شوية لكن ده لانشغالى والله مش اكتر

فى ناس كده تقابلها تلاقيها بتقولك ان مفيش حاجه اسمها مشاكل

لان كل مشكلة وليها حل ... او اكتر من حل كمان

زى ما انا باقول كده ..

وطبعا فى ناس بتقول على الكلام ده كلام اهبل

لان فى مشاكل مالهاش حل

وكمان بيقولو انهم جربوا المشاكل اللى مالهاش حل دى

ياترى مين فيهم اللى صح ؟

ياترى فعلا كل المشاكل ليها حلول

ولا فى مشاكل مابتتحلش


انا فى رأيى ان كل مشكلة ليها حل .. ويمكن اكتر من حل كمان

بس نشغل دماغنا ..

لانه لو وقف ساعتها .. هايبقى رأينا زى رأى الناس التانيه

وهانلاقى نفسنا بنقول المشاكل مالهاش حل


لو مرة مثلا واحد وقع فى مشكلة

ولتكن المشكلة دى الحب مثلا

وطبعا ده مثال واقعى جدا وزى الفل

المهم

واحد من الناس بيحب واحده لدرجة انه مش عارف ينام

وطبعا مش دى المشكلة

المشكلة انها خدعته وفهمته انها بتحبه وبعد كده اتخطبت لواحد تانى

اظن المشكلة دى موجوده فى حياتنا كتير

وطبعا العكس ممكن يحصل علشان ماحدش يفهمنى غلط يعنى

ناس كتييييير بتقول ان دى مشكلة مالهاش حل

وتيجى تكلمه وتقوله يابنى شوف حياتك ومستقبلك

يقولك مش قادر .. وعمال طول الوقت مش عارف يعيش

طيب يابنى انسى

يقولك مش قادر انسى

طيب يابنى حب واحده تانية واخطبها

يقول مش قادر انا باحبها

تعرفوا انى قلت اكتر من حل للمشكلة فى كلامى دلوقتى

اول حل انه يشوف مستقبله ويركز فى حياته

والتانى انه ينسى الموضوع ده

والتالت انه يحب واحده تانيه ويخطبها مثلا

بس هوا مش قادر


وهوا ده اساس موضوعى النهارده

ان الحلول فعلا موجوده

لكن الواحد فينا مقتنع انه مش هايقدر يحل المشكلة

علشان كده عمره ما هايقدر يحلها


او مبسوط وهوا جوه المشكلة

على فكرة فى ناس كده .. بتكون سعيده وهيا فى المشاكل


المهم

لو انا عندى ثقه فى نفسى وفى قدراتى

هاقدر احل اى مشكلة تقابلنى

مهما كانت المشكلة دى

ومهما كانت كبيرة

أشغل عقلى .. أحل المشكلة

أوقف عقلى .. يبقى مالهاش حل فعلا

بالطريقة دى الواحد ممكن فعلا يعيش فى الدنيا بدون متاعب الى حد ما


بس ده مش هايبقى كفاية على فكرة

صحيح ان الواحد كل لما يقع فى مشكلة هايلاقى حل


لكن اللى عاوز اوصله النهارده

اننا مش لازم نقع فى المشاكل اساسا


طالما هاشغل عقلى علشان اطلع من مشكلة معينه

طيب ما انا اشغل عقلى قبل كده بشوية وبلاش اقع فى المشكلة اساسا

وكالعاده هاقول ان الموضوع ده مش سهل ابدا

ومش عاوز حد يطلع فى التعليقات ويقولى

اصل كلامك ده صعب يتنفذ .. طيب ما انا عارف


المهم

ازاى اعيش حياتى من غير ما اقع فى مشكلة حقيقية ؟

اسمها طريقة التوقع الشبكية

وشرحها وبكل بساطه

انى بيكون عندى توقع لكل حاجه هاتحصل

وباكون جاهز وعندى ردة فعل سريعة جدا


ساعتها لما تيجى تقع فى اى مشكلة

هاتلاقى نفسك واقع واقف


لانك فعلا فكرت وتوقعت وردة فعلك السريعة هاتنقذك من المشكلة قبل ماتقع فيها

وده هايحتاج منك انك عقلك يشتغل 24 ساعه وده مش وحش

لانه هما دول اللى بيعيشو مرتاحين

اللى بيشغلو عقلهم

الطريقة من انتاج عمار فتحى

مش عارف اذا كانت موجوده ولا

او حد نفذها قبل ولا لا

بس انا وضعتها بين ايديكم وخلاص


بس تصدقوا لو كل الناس عملت كده

مش هايبقى فى الدنيا اى مشاكل خالص

علشان كده مش اى حد هايقدر يعمل كده

وعلشان كده هاتفضل المشاكل موجوده

وهاتفضل ناس تقول فى حلول

وناس تقول مفيش فايده

امال هاتبقى دنيا ازاى ؟

ماهيا دى الدنيا

تحياتى

ع

م

ا

ر

هناك 16 تعليقًا:

حسن حنفى يقول...

مممممم

ولا يهمك

ان طبعا تقدر تكمل

قدها وقدود

ربنا معاك

ابراهيم يقول...

نستطيع ان نفعل كل شي ان قبلناالتحدي
ووجهناانفسنا الي الطريق الصحيح

ادعوك لزيارةمدونتي

حـــــدوتـــــة يقول...

السلام عليكم

فكك من اى حد
بس انت متنزلش بوست كل شهرين وتقولى انا عايز احل المشكلة
بطل كسل

سلالالالالالالالالالالالالالالالالالالالالالالالالام

غير معرف يقول...

مش عارفه متفقه معاك تماما ولا مختلفه معاك خالص
بص .... يمكن متفقه معاك فى انى من الناس اللى شايفه ان كل مشكله ليها حل واكتر من حل.
بس مختلفه معاك فى ان الحل اننا نشغل دماغنا.
لان بمنتهى البساطه سعات مشاكلنا بتتحل لما نفكر بعقل طفل عنده خمس سنين .... يعنى لما بنفكر ببساطه.
وسعات بتتحل لما بنتجاهلها ... او نصبر لحد ما تنتهى لوحدها .
وعلى الرغم من ايمانى بالمواجهه ... بس سعات الحل بيكون الهروب
وسعات الحل مبيكنش بالاصرار ... ممكن يكون الاستسلام
واخيرا سعات المسكله بتكون مجرد اختبار ربنا عايزنا نتصرف فيه صح ليس الا ... والحل بيكون من عنده ... وسعينا ليس الا اثبات لايماننا
الحياه اوسع من مشكله واحده وابعادها اكتر من نتيجه واحده ... سعات بيكون الحل الامثل مش صح ... لان عشان نوصله هنضحى بحجات تانيه مهمه ويمكن اهم من المشكله ذات نفسها
اخيرا شكرا على طوله بالك فى قرايه التعليق ... وعجبنى بوستك جدا
سلام

ريمان يقول...

السلام عليكم

انت طبعا تقدر تكمل فى المدونه وتكتب مواضيع هادفه جدا كمان

عجبتنى اوى طريقة التوقع الشبكية

فعلا عندك حق

وكلام مظبوط ان الانسان لما بيقفل مخه لازم مش هيلاقى قدامه حل لمشكلته حتى لو ليها الف حل هوم مش هيقدر يحلها لانه اصلا بيكون مستسلم ومتكاسل عن حلها

مع تحياتى

ريمان

نوسه وريمان فى هاكونا مطاطا يقول...

مشتنسى تنورنا فى هاكونا مطاطا عشان تفرفش شويه

مدونة حكومتى ملاك يقول...

السلام عليكم ,

فعلا مفيش مشكلة مالهاش حل
بس مش عارف ليه البلد مليانة مشاكل

مشكلة العيش
مشكلة المياه
مشكلة الفقر
مشكلة البطالة
مشكلة...و..........

بجد غريبة أووى الحكاية دى
هو مين بيفكر لنا ومين بيخطط ومين بيتوقع لنا المشاكل ومين ومين ومين ...

ياريت كل المسؤلين يفكروا بمنهجية ويطبقوا النظريات دى
أو الشعب يفكر ويتخلص من المسؤلين دول


تحياتى
عمار صبرى

ندا منير يقول...

انا عايزة اقولك حاجتين:
..............
اولا كلنا عندنا مشاكل وطبعا مفيش حاجة اسمها ملهاش حل زى ما انت قلت هو بس حلها ممكن يكون على حساب حاجة تانية او تضحية بحاجة تانية وامشاكل كتير حلها بيكون له خساير كتير بس اهو ارحم من المشكلة نفسها

ثانيا : بالرغم من ان دى اول زيارة ليا لمدونتك الا انى لقيت انى بعمل الح اللى انت قلت عليه عشان مش نقع فى المشاكل وبتوقع الوحش دايما فى كل حاجة وفعلا ساعات الوحش دا بيحصل بس بقى ساعات بقدر اكون متوقعة حلها وساعات بتكبر منى بس برده بحلها بس بيكون بعد ما خصرت حاجات تانية .

وموضوعك جميل قوى وفكرته جديدة

لؤلؤة الاسلام يقول...

ما شاء المدونة جميللللللللللللللة
و شكرا لك على هذا البوست

و تحياااااااااااتى
رمضان
كريم

و كل عام و انتم بخير

محمد مارو يقول...

على رائيك ما هى دى الدنيا

طالبه الفردوس يقول...

السلام عليكم

عندك حق والله ربنا يرحمنا

hasona يقول...
أزال المؤلف هذا التعليق.
hasona يقول...

كل الغيبة دي
ده استسلام ولا ظروف خارجة عن ارادتك

نور جديد يقول...

السلام عليكم
الحقيقة نظرية رائعة و موافقة عليها جدا
حتى دايما اقولها
بس الحقيقة انا اعتقد ان المشاكل هتفضل موجودة لان دي سنة ربنا في الكون
مينفعش الحياة تخلو من المشاكل عشان ربنا عايزنا نفضل نلجا له و نشتاق للجنة التي تخلو من المشاكل
بس موافقة على كلام حضرتك
جزاكم الله خيرا
و عموما بيعجبني البساطة في الاسلوب
احييك

غير معرف يقول...

أين ذهب هذا المبلغ الضخم وهو " 130 مليار دولار" ؟.....؟

فى حديثه بقناة الجزيرة فى سبتمبر الفين وأربعة قال الأستاذ محمد حسنين هيكل أنه خلال الثلاثين سنة الأخيرة حصلت مصر على 150 مليار دولارعلى شكل منح وقروض وهبات .. صرف منها حوالى 12 مليار دولارعلى مشاريع البنية الأساسية وستة مليارات دولارعلى مشروع مترو الأنفاق .. ومصيرالمبلغ الباقى غير واضح !!!! أين ذهب هذا المبلغ الضخم وهو " 130 مليار دولار" ؟.....؟

ارجو من كل من يقراء هذا ان يزور ( مقالات ثقافة الهزيمة) فى هذا الرابط:

www.ouregypt.us

anonymous يقول...

بسم الله
السلام عليكم ورحمه الله
كيفك ياعمار
بقالك كتير جدا مش كتبت ومفيش حد عارف عنك حاجه
يارب تكون بخير انا بسال عليك كتير
ياريت لو بتدخل هنا وشوفت تعليقي طمني عليك
أختكـ جيلان بنت القسام