الخميس، 21 أغسطس، 2008

وهوا ده حل المشاكل كلها ؟ ؟


فى البداية احب اقول السلام عليكم

فى الحقيقة انى لقيت بعض المدونين بيقولولى انتا مش هاتقدر تكمل كتابة فى المدونة دى

وانى اخترت طريق صعب ومش هاقدر اكتب فيه

وانى مش هالاقى كلام اكتبه بعد كده

مش عارف انا اللى بيقول كده ده قرأ اول بوست ليا ولا لا

عموما هوا بعنوان ايه حكاية الدنيا


خلينا ندخل فى موضوع النهارده وهوا طبعا متأخر شوية لكن ده لانشغالى والله مش اكتر

فى ناس كده تقابلها تلاقيها بتقولك ان مفيش حاجه اسمها مشاكل

لان كل مشكلة وليها حل ... او اكتر من حل كمان

زى ما انا باقول كده ..

وطبعا فى ناس بتقول على الكلام ده كلام اهبل

لان فى مشاكل مالهاش حل

وكمان بيقولو انهم جربوا المشاكل اللى مالهاش حل دى

ياترى مين فيهم اللى صح ؟

ياترى فعلا كل المشاكل ليها حلول

ولا فى مشاكل مابتتحلش


انا فى رأيى ان كل مشكلة ليها حل .. ويمكن اكتر من حل كمان

بس نشغل دماغنا ..

لانه لو وقف ساعتها .. هايبقى رأينا زى رأى الناس التانيه

وهانلاقى نفسنا بنقول المشاكل مالهاش حل


لو مرة مثلا واحد وقع فى مشكلة

ولتكن المشكلة دى الحب مثلا

وطبعا ده مثال واقعى جدا وزى الفل

المهم

واحد من الناس بيحب واحده لدرجة انه مش عارف ينام

وطبعا مش دى المشكلة

المشكلة انها خدعته وفهمته انها بتحبه وبعد كده اتخطبت لواحد تانى

اظن المشكلة دى موجوده فى حياتنا كتير

وطبعا العكس ممكن يحصل علشان ماحدش يفهمنى غلط يعنى

ناس كتييييير بتقول ان دى مشكلة مالهاش حل

وتيجى تكلمه وتقوله يابنى شوف حياتك ومستقبلك

يقولك مش قادر .. وعمال طول الوقت مش عارف يعيش

طيب يابنى انسى

يقولك مش قادر انسى

طيب يابنى حب واحده تانية واخطبها

يقول مش قادر انا باحبها

تعرفوا انى قلت اكتر من حل للمشكلة فى كلامى دلوقتى

اول حل انه يشوف مستقبله ويركز فى حياته

والتانى انه ينسى الموضوع ده

والتالت انه يحب واحده تانيه ويخطبها مثلا

بس هوا مش قادر


وهوا ده اساس موضوعى النهارده

ان الحلول فعلا موجوده

لكن الواحد فينا مقتنع انه مش هايقدر يحل المشكلة

علشان كده عمره ما هايقدر يحلها


او مبسوط وهوا جوه المشكلة

على فكرة فى ناس كده .. بتكون سعيده وهيا فى المشاكل


المهم

لو انا عندى ثقه فى نفسى وفى قدراتى

هاقدر احل اى مشكلة تقابلنى

مهما كانت المشكلة دى

ومهما كانت كبيرة

أشغل عقلى .. أحل المشكلة

أوقف عقلى .. يبقى مالهاش حل فعلا

بالطريقة دى الواحد ممكن فعلا يعيش فى الدنيا بدون متاعب الى حد ما


بس ده مش هايبقى كفاية على فكرة

صحيح ان الواحد كل لما يقع فى مشكلة هايلاقى حل


لكن اللى عاوز اوصله النهارده

اننا مش لازم نقع فى المشاكل اساسا


طالما هاشغل عقلى علشان اطلع من مشكلة معينه

طيب ما انا اشغل عقلى قبل كده بشوية وبلاش اقع فى المشكلة اساسا

وكالعاده هاقول ان الموضوع ده مش سهل ابدا

ومش عاوز حد يطلع فى التعليقات ويقولى

اصل كلامك ده صعب يتنفذ .. طيب ما انا عارف


المهم

ازاى اعيش حياتى من غير ما اقع فى مشكلة حقيقية ؟

اسمها طريقة التوقع الشبكية

وشرحها وبكل بساطه

انى بيكون عندى توقع لكل حاجه هاتحصل

وباكون جاهز وعندى ردة فعل سريعة جدا


ساعتها لما تيجى تقع فى اى مشكلة

هاتلاقى نفسك واقع واقف


لانك فعلا فكرت وتوقعت وردة فعلك السريعة هاتنقذك من المشكلة قبل ماتقع فيها

وده هايحتاج منك انك عقلك يشتغل 24 ساعه وده مش وحش

لانه هما دول اللى بيعيشو مرتاحين

اللى بيشغلو عقلهم

الطريقة من انتاج عمار فتحى

مش عارف اذا كانت موجوده ولا

او حد نفذها قبل ولا لا

بس انا وضعتها بين ايديكم وخلاص


بس تصدقوا لو كل الناس عملت كده

مش هايبقى فى الدنيا اى مشاكل خالص

علشان كده مش اى حد هايقدر يعمل كده

وعلشان كده هاتفضل المشاكل موجوده

وهاتفضل ناس تقول فى حلول

وناس تقول مفيش فايده

امال هاتبقى دنيا ازاى ؟

ماهيا دى الدنيا

تحياتى

ع

م

ا

ر

الأربعاء، 16 يوليو، 2008

لا تحزن .. لان الفرح موجود !!!

اول مانكتب عن الحزن والفرح

تلاقى ناس كتير عيونهم فتحت اوى

يا اما فرحانين وخايفين من الحزن يا اما عندهم حزن وبيدورو ع الفرح

يا اما الفرح والحزن عندهم شكل بعض ومش فارقة

المهم

ايه هيا حقيقة الفرح او الحزن ؟؟

الاتنين احساس بينتاب الواحد فينا لما يحصله موقف معين او شىء معين


ومش كل المواقف بتفرح كل الناس
وكمان مش كل المواقف بتزعل كل الناس

طيب نضرب مثال علطول

ولنفترض مثلا ان فى واحد قاعد مستنى النتيجة

والتليفون رن

الووووووووو

ايوه

مبروووووووووووك نجحت

انا اعتقد ان فى حالة زى دى لازم الواحد يفرح
مش كده ؟ ؟ ؟ ؟ ؟

لا مش كده

ومش كل الناس


هاتفرق من شخص للتانى

لانه مثلا ممكن يكون متوقع النتيجة او مش فارقة معاه او او او


وفى الحالة دى مش هايفرح

وممكن واحد تانى اول مايسمع انه نجح يفرح جدا ويبقى عاوز يطير

انا مش دى مشكلتى فى موضوع النهارده

لانكم اساتذتنا وعارفين الفرح والحزن كويس وكلنا مرينا بيهم


المهم فى موضوعى النهارده

هو كيفية تغيير حالة الحزن الى فرح والعكس !!

طبعا هانبدأ بالعكس

اللى هوا تغيير حالة الفرح الى حزن .. وفى الحالة دى مش هانشرح ازاى نغيرها طبعا

ربنا يديم علينا الفرح كلنا

خلينا فى التانية

ازاى احول حالة الحزن الى حالة فرح ؟ ؟ ؟

وطبعا مش بنتكلم على حالات الحزن المفروضة علينا

اللى مثلا لا قدر الله فى حالة وفاة حد قريبنا او كده

لا انا اقصد حالات الحزن المختلقة
وهاقولكم ازاى
احنا مش اتفقنا ان الحزن والفرح احساس

وبيبقى اللى فى حالة حزن ده

ماحاولش يفكر اساسا هوا حزين ليه

وكمان عمال طول ماهوا حزين يفتكر حاجات قديمة مؤلمة وعدى عليها زمن

لحد لما يجيله اكتئاب .. وبدون سبب

انا من خلال تجربتى البسيطه اكتشفت ان الواحد ممكن يكون حزين جدا

وفى دقيقتين يتقلب حاله الى سعاده وكمان سعاده لذيذه جدا
طيب ازاى ؟
الموضوع مش سهل الحقيقة

ومش اى حد يقدر يعمل كده

بس لو عملنا كده دنيتنا هاتبقى احسن

بكل بساطه اول ماتلاقى نفسك فى حالة حزن معينة

تروح عامل ريستارت بسرعه

يعنى ايه ؟

يعنى توقف تفكيرك للحظات

وتروح مشغل عقلك تانى باقصى سرعه

وفى خلال دقيقتين تكون فكرت فى حاجه واحده بس

انا حزين ليه ؟

ودى اول خطوة ولو عملت كده يبقى انتا كده تقريبا بدأت تخرج من حالة الحزن

وتانى خطوة .. اسباب الحزن دى أحلها ازاى ؟

وتالت خطوة .. هيا الفرح

يعنى فى دقيقتين تلاته هاتتقلب حالتك من حزن لفرح

انا حاسس ان كلامى لسه مش واضح

علشان كده هاضرب مثال

لو فى يوم من الايام لقيت نفسك حزين

وحالتك النفسية فى الارض

اللى هيا بلغتنا اليومين دول مخنووق ومش طايق حد

طيب واحده واحده كده

اقف لحظه واحده وخد نفس وبعد كده ابدأ فكر علطول

ايه اللى مزعلنى ؟؟

ان احمد صاحبى قفش منى النهارده وزعل وان مفيش معايا فلوس

وان النت فاصل وان اهلى فى البيت مش بيرحمونى فى الكلام

لحظة واحده بئه ...

احمد وبالليل ابعتله رسالة اصالحه والفلوس ممكن استلفها او فلان عنده ليا 50 جنيه هاروح اجيبهم

وفصل النت مش هايموتنى يعنى واهلى هاعملهم الى هما عاوزينه وبمزاجى ومن غير ما ازعل حد

ايه اللى لسه مزعلنى بئه ؟

مفيش خلاص

ولما هوا مفيش زعلان ليه

هاتلاقيك بتبتسم ابتسامه خفيفة

لانك حليت كل مشاكلك بمجرد انك شغلت عقلك
وغيرت احساسك من الحزن للفرح
وده طبعا مع اختلاف الاسباب من واحد للتانى للتالت

كنت عاوز اقول حاجه مهمه جدا

دايما لازم نحسب الامور
يعنى هاكون كسبان امتى وخسران امتى ؟
وقارن انتا بين الحالتين حالة الفرح وحالة الحزن المختلقة

هاتلاقيك كسبان فى حالة من الاتنين

واكيد اللى هيا حالة الفرح

بس لما تبقى مخنوق اوى اوى يعنى

ابقى احزن شوية ياسيدى بس بمزاجك .. وخليك مستعد

انك تقلب حالة الحزن دى فى اى لحظة الى حالة فرح وابتسام
وهاختم بكلمة الدكتور الفقى
اذا كنت انتا كده كده عايش
يبقى ليه مش تعيش باحسن حال
ليه مش تعيش بافضل طريقة ممكنه
بس كده
انا حاسس انى طولت عليكم

بس استحملونى

انا ليا مين غيركم

تحياتى
ع

م

ا

ر

الثلاثاء، 24 يونيو، 2008

وبنقابل شخصيات ..!!!


فى الاول اعذرونى انى باتأخر فى تنزيل الموضوعات
خلينا ندخل فى الموضوع علطول
اتفقنا اننا فى حياتنا بنمر بمواقف
وان المواقف دى بتعلمنا
وتقريبا مفيش حد كان معترض على الكلام .. مش عارف ليه ؟ ؟
الظاهر كده انه صح .. ماعلينا
المواقف اللى بتقابلنا فى حياتنا دى بيبقى اطرافها شخصيات
بنى ادمين يعنى بنتعامل معاهم
وكانو يقولولنا واحنا صغيرين الصديق عند الشدة
ولما كبرنا شوية كده قالولنا ان الناس بتبان على اصلها فى الغربة
كل ده على فكره كلام صح جدا
ببساطه كده لو سألتك عن صديقك هاتبقى عارف شخصيته ولا لا ؟ ؟
طيب ولو سألتك عن اخوك .. ها ؟؟؟
اكيد هاتبقى عارف شخصيته كويس جدا
والعكس صحيح يعنى لو سألتك عن واحد ماشى فى الشارع هاتقولى
ماعاملتوش ماعرفش عنه حاجه
وده طبعا لان اخوك وصاحبك عايشين معاك .. ومريتو بمواقف كتير مع بعض
المشكلة بئه مش فى كل ده
المشكلة .. انتا لما تمر بموقف معين مع واحد هاتقدر تحدد شخصيته ولا لا
وياترى موقف واحد كفاية علشان تحدد الشخصية اللى قدامك
ولو فعلا قلت اه ان موقف واحد كفاية فتبقى حاجه من اتنين
يا اما كلامك غلط وبتكدب .. ودى مستبعده
يا اما فعلا بتقدر تحدد وفى الحاله دى مش هاتتعب اوى فى حياتك
وطبعا السؤال دلوقتى
اذا كنت بامر بمواقف كتيرة مع شخص معين وبرده مفيش فايده ..
مش باقدر احدد الشخصية ؟؟؟؟ ايه الحل ؟؟
فى الاول انا باعتبرها موهبة وفى ناس بتنميها وناس لا
حالها حال كل المواهب
لكن التعليم والتدريب بيجيب نتيجة برده
انا اللى اعرفه فى الموضوع ده انه كله عباره عن عملية رياضية معقده
يعنى قدامك شوية معطيات ومجهول وبتبدأ توصل للمجهول من خلال المعطيات دى
طيب زى ايه المعطيات
نظرات العنين .. طريقة الكلام ... شكل الضحكة .. ردة فعل معينه
طيب زى ايه المجهول
شخصيته .. حالته النفسية .. حالته العاطفية .. طريقة تفكيره .. وهكذا
وعلشان تقدر تعيش فى الدنيا وماتتعبش اوى لازم تكون لماح جدا وسريع البديهه جدا
ولحد ماتوصل لدرجة انك تحكم على واحد بمجرد النظر فى عنيه
يمكن يطلع حكمك غلط ويمكن يطلع حكمك صح
الاهم فى الموضوع .. ان حكمك ده يبقى لنفسك وماتنقلوش لحد تانى ابدا
ولو طلع حكمك على الشخص ده صح
صدقنى .. لازم تكافىء نفسك
وصدقنى كمان مره لما تكافىء نفسك هاتتحسن كتير اوى
وصدقنى بئه كمان مره لو اتحسنت كتير اوى هاتفهم الناس من اول نظره
وساعتها هاترتاح كتيييييييييير.. فى الدنيا
وهاتفتكر اللى كتبلك الموضوع ده ......... ** عمار فتحى **

السبت، 7 يونيو، 2008

ايه حكاية الدنيا !!!



كنت هاكتب فى المدونة دى باللغة العربية


بس لقيت الموضوع مش هاينفع


فهاكتب بالعامية برده


المهم ..


فى ناس سألت المدونة دى هاتتكلم عن ايه


وليه بالذات اسم زووم ع الدنيا


بكل بساطه فى ناس كتير مش فاهمه الحياة ماشية ازاى


والموضوع مش بالسن


الموضوع بالتجارب ... وبالمواقف


وده مش معناه برده انى فيلسوف ولا حكيم ولا مفكر ولا دكتور ولا كل الكلام ده


بس انا فتحت مجال للمناقشه وخلاص


واكيد هايبقى فى معارضه كتير للكلام


لانى اخترت مجال يكثر فيه المجادلة والنقاش


مش هاتناول الدنيا من ناحية دينيه


وان كان مرجعيتنا فى الاخر للاسلام


ايه حكاية الدنيا صحيح ؟؟


ناس كتير سعيده


وناس حزينه


ناس بتفكر


وناس مابتفكرش


ناس عايشه وعايشه


وناس عايشه ومش عايشه


لما كنت اركب القطر كنت اقعد اتفرج على الناس والبلاد اللى القطر بيعدى عليها


والاقينى باقول لنفسى ..


ياااااااااااااااااااااااه كل البلاد دى


وكل البيوت دى




وكل الناس دى




ياترى البيت اللى هناك ده فى فرح ولا فى حزن




ياترى العمارة اللى هناك دى فيها مشاكل ولا آيلة للسقوط ولا ولا ولا




ياترى الراجل اللى ماشى هناك ده مبسوط و زعلان ولا ولا




ياترى الشاب اللى هناك ده عنده مشاكل ولا مزاجه حلو ولا مدمن ولا ولا ولا ولا




كنت باحس ان الدنيا دى كبيره اوى وفيها كل حاجه ..


وكنت بابقى نفسى اعرف كل حاجه ..


ولقتنى علشان اعرف كل حاجه .. لازم اعرف ايه حكاية الدنيا ؟؟


وعلشان اعرف ايه حكاية الدنيا




كان لازم امر بمواقف تعلمنى ده




لان دى الطريقه الوحيده علشان تفهم الدنيا وعلشان تفهم الناس




عمر المختار كان بيقول ... الضربة التى لاتقسم ظهرك تقويك


يعنى تتعلم منها


الخيبه الكبيره بقه انك ماتتعلمش منها ..


وده بقه اللى بنقول عليه خايب وطيب وغلبان وعلى نياته .


علشان كده لازم تشغل عقلك فى كل موقف بتمر بيه


وتتعلم منه ..


وصدقنى .. لما تتعلم وتتعلم وتتعلم


هاتبص فى وش اى حد هاتفهمه وهاتفهم حياته وهاتفهم هوا عاوز ايه .


وهاتفهم ايه حكاية الدنيا ..


وكلنا بنمر بتجارب ومواقف



بس فينا اللى بيتعلم وبيعرف ايه حكاية الدنيا




وفينا اللى بيتعلم ومابيوصلش




وفينا اللى مابيتعلمش




وفينا اللى بيتكسر فى اول موقف واول تجربة



ياترى بقه ....


ايه حكاية الدنيا ؟؟؟ ؟؟ ؟؟ ؟؟ !! !! !!

الثلاثاء، 13 مايو، 2008

لسه تحت الانشاء والله

المدونة دى ان شاء
هاتنزل الساحه قريب
فى حالة دخولك هنا دلوقتى
وفى حالة انك بتقرأ الرسالة دى
يبقى انا لسه باظبط فيها
شكرا على مرورك
سلامو عليكو