اول مانكتب عن الحزن والفرحتلاقى ناس كتير عيونهم فتحت اوى
يا اما فرحانين وخايفين من الحزن يا اما عندهم حزن وبيدورو ع الفرح
يا اما الفرح والحزن عندهم شكل بعض ومش فارقة
المهم
ايه هيا حقيقة الفرح او الحزن ؟؟
الاتنين احساس بينتاب الواحد فينا لما يحصله موقف معين او شىء معين
ومش كل المواقف بتفرح كل الناس
وكمان مش كل المواقف بتزعل كل الناس
طيب نضرب مثال علطول
ولنفترض مثلا ان فى واحد قاعد مستنى النتيجة
والتليفون رن
الووووووووو
ايوه
مبروووووووووووك نجحت
انا اعتقد ان فى حالة زى دى لازم الواحد يفرح
مش كده ؟ ؟ ؟ ؟ ؟
لا مش كده
ومش كل الناس
هاتفرق من شخص للتانى
لانه مثلا ممكن يكون متوقع النتيجة او مش فارقة معاه او او او
وفى الحالة دى مش هايفرح
وممكن واحد تانى اول مايسمع انه نجح يفرح جدا ويبقى عاوز يطير
انا مش دى مشكلتى فى موضوع النهارده
لانكم اساتذتنا وعارفين الفرح والحزن كويس وكلنا مرينا بيهم
المهم فى موضوعى النهارده
هو كيفية تغيير حالة الحزن الى فرح والعكس !!
طبعا هانبدأ بالعكس
اللى هوا تغيير حالة الفرح الى حزن .. وفى الحالة دى مش هانشرح ازاى نغيرها طبعا
ربنا يديم علينا الفرح كلنا
خلينا فى التانية
ازاى احول حالة الحزن الى حالة فرح ؟ ؟ ؟
وطبعا مش بنتكلم على حالات الحزن المفروضة علينا
اللى مثلا لا قدر الله فى حالة وفاة حد قريبنا او كده
لا انا اقصد حالات الحزن المختلقة
وهاقولكم ازاى
احنا مش اتفقنا ان الحزن والفرح احساس
وبيبقى اللى فى حالة حزن ده
ماحاولش يفكر اساسا هوا حزين ليه
وكمان عمال طول ماهوا حزين يفتكر حاجات قديمة مؤلمة وعدى عليها زمن
لحد لما يجيله اكتئاب .. وبدون سبب
انا من خلال تجربتى البسيطه اكتشفت ان الواحد ممكن يكون حزين جدا
وفى دقيقتين يتقلب حاله الى سعاده وكمان سعاده لذيذه جدا
طيب ازاى ؟
الموضوع مش سهل الحقيقة
ومش اى حد يقدر يعمل كده
بس لو عملنا كده دنيتنا هاتبقى احسن
بكل بساطه اول ماتلاقى نفسك فى حالة حزن معينة
تروح عامل ريستارت بسرعه
يعنى ايه ؟
يعنى توقف تفكيرك للحظات
وتروح مشغل عقلك تانى باقصى سرعه
وفى خلال دقيقتين تكون فكرت فى حاجه واحده بس
انا حزين ليه ؟
ودى اول خطوة ولو عملت كده يبقى انتا كده تقريبا بدأت تخرج من حالة الحزن
وتانى خطوة .. اسباب الحزن دى أحلها ازاى ؟
وتالت خطوة .. هيا الفرح
يعنى فى دقيقتين تلاته هاتتقلب حالتك من حزن لفرح
انا حاسس ان كلامى لسه مش واضح
علشان كده هاضرب مثال
لو فى يوم من الايام لقيت نفسك حزين
وحالتك النفسية فى الارض
اللى هيا بلغتنا اليومين دول مخنووق ومش طايق حد
طيب واحده واحده كده
اقف لحظه واحده وخد نفس وبعد كده ابدأ فكر علطول
ايه اللى مزعلنى ؟؟
ان احمد صاحبى قفش منى النهارده وزعل وان مفيش معايا فلوس
وان النت فاصل وان اهلى فى البيت مش بيرحمونى فى الكلام
لحظة واحده بئه ...
احمد وبالليل ابعتله رسالة اصالحه والفلوس ممكن استلفها او فلان عنده ليا 50 جنيه هاروح اجيبهم
وفصل النت مش هايموتنى يعنى واهلى هاعملهم الى هما عاوزينه وبمزاجى ومن غير ما ازعل حد
ايه اللى لسه مزعلنى بئه ؟
مفيش خلاص
ولما هوا مفيش زعلان ليه
هاتلاقيك بتبتسم ابتسامه خفيفة
لانك حليت كل مشاكلك بمجرد انك شغلت عقلك
وغيرت احساسك من الحزن للفرح
وده طبعا مع اختلاف الاسباب من واحد للتانى للتالت
كنت عاوز اقول حاجه مهمه جدا
دايما لازم نحسب الامور
يعنى هاكون كسبان امتى وخسران امتى ؟
وقارن انتا بين الحالتين حالة الفرح وحالة الحزن المختلقة
هاتلاقيك كسبان فى حالة من الاتنين
واكيد اللى هيا حالة الفرح
بس لما تبقى مخنوق اوى اوى يعنى
ابقى احزن شوية ياسيدى بس بمزاجك .. وخليك مستعد
انك تقلب حالة الحزن دى فى اى لحظة الى حالة فرح وابتسام
وهاختم بكلمة الدكتور الفقى
اذا كنت انتا كده كده عايش
يبقى ليه مش تعيش باحسن حال
ليه مش تعيش بافضل طريقة ممكنه
بس كده
انا حاسس انى طولت عليكم
بس استحملونى
انا ليا مين غيركم
تحياتى
ع
م
ا
ر
هناك 15 تعليقًا:
كلااااااااااااام
جميييييييييييييل
و كلاااااااااااااااااااام
معقوووووووووووووووووووول
مقدرش اقول حاجه عنه
لكن خيال حبيبى المجهول حبيبى
ايه ده نسيت و كنت هغنى
كلام جميل و كلام معقول بس مين لديه القدره انه يكون حزين و يقدر يفكر فى حاجه تانيه
الحزن زى الالم
مثلا لو واحد ضرسه بيوجه
ممكن يبطل وجع لو شغل نفسه بحاجه تانيه
الحزن كده برضو
بس مين يقدر بقى
انا عن نفسى لما بكون جزين اول حاجه بعملها بفكر فيك طواااااااالى
بزداد كابه طبعا
هههههههههه
الله عليك يا عمار
والله بجد المفروض الواحد يعمل ريستارت لنفسه بس لو الزعل لأمر ممكن نعديه زي موضوع الفلوس والأصدقاء المخلصين
تعرف هقولك على حاجة جماعة اصحابي عملوا عليا رباطية وعملوا زعلانين علشان محضرتش فرح واحد فيهم ... المهم يا سيدي زعلت شوية بس بعد كدة فكرت انا هستفاد ايه من زعلي ده ... لقيت ولا حاجة ... روحت عامل ريستارت ومسكت الفيل بتاع العيال دول وحطيته في سلة المهملات "ههههههههههههههههههههه"
ولقيت نفسي فل والحمد لله
سلاموز علشان طولت عليك
السلام عليكم
على فكرة يا اخ عمار
مدونتك دى فيها حاجه غريبه
انا اول مرة اقرا بوست وابقى مش عايزاه يخلص
سبحان الله
على فكره انا بزور مدونتك كل يوم عشان اترقب اصدار البوست الجديد
..............
البوست بجد رائع جدا جدا
وانت فعلا حليت المشكله
وازاى الانسان ممكن يقلب حاله الحزن الى فرح
على فكره
انا كنت من دقيقتين مكتئبه جدا
ومضايقه اوى
لانى المفروض الوقتى اخد حقنه وانا مش موافقه انى اخدها
لدرجه ان لما معادها جه تعبت جدا وبرضه ماخدتهاش
وفضلت زعلانه وخايفه وقولت انى مش هاخدها بس برضه هتعب من غيرها
المهم لما قرات البوست
حددت سبب حاله الخنقه اللى انا فيها
وهقوم دلوقتى بعد ما اخلص التعليق عشان احول حاله الحزن لفرح
قولت لنفسى هيحصل ايه يعنى لو هاخد الحقنه الامر بسيط جده شكه دبوس بس
على فكره انا مش عايزه اخلص تعليق عشان اروح اخدها
هههههههههههههههه
معلش طولت عليك
بس يا اخ عمار المشكله ان الواحد ممكن يكتئب من حاجات تافهه جدا ومن حاجات صغيرة اوى وبسيطه اوى
وبيكبر المسائل والامور وبيقوم الدنيا ومش يقعدها
وساعات الانسان ممكن يحزن ويبكى ومش بيلاقى سبب
ليا واحده صاحبتى ساعات بتبكى وتحزن جدا جدا وتقولى مش عارفه انا بعيط ليه
؟؟؟؟؟؟؟؟؟
يا ترى ده من ايه
انا ساعات برضه بيحصلى كده
............................
طولت عليك برضه يا اخ عمار استحملنى
على العموم
بوست رئع جدا وانا منتظره البوست القادم
وانا الوقتى هقوم احول حاله الحزن لفرح زى ما قولت فى البوست
مع تحياتى
ريمان
انتا فين ياحبى
:d
راديكالى
بوست جمييييييييييييييل
شكرا علي المدونه الرائعه
انا حطيتها في المفضله
اللى عايز ياخد الامور ببساطة عشان يكون سعيد هيعيش سعيد
واللى بيدور على النكد هو حر
تحياتى
جريدة الأسرة العربية
قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها
وسوف يفتح باب التدريب الصحفى لهواة الصحافة من المدونين
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى
amyasser@hotmail.com
أو بتعليق على هذا البوست نفسه
يترك لينك البوست اللى عايز ينشره الجرنال له
تحت عنوان جريدة الأسرة العربية
الشـــــــــــــــــروط
-مراعاة الصحة اللغوية والنحوي والإملائية قدر الإمكان.
-مراعاة الا يزيد البوست المراد نشره فى الجريدة عن صفحة ايه فور.
- أولوية النشر تكون للبوستات التى فيها موضوعات عامة تهم قراء الصحف.
-اولوية النشر للبوستات التى ترسل على الميل المذكور أعلاه كفايل وورد مرفق.
الجريدة تصدر الإثنين من كل أسبوع
أتفق معك..
جزاك الله خيرا
ياريت كان بايدينا
كنا لغينا قلوبنا ودوسنا علي الحزن اللي ساكن فيها
وحولناها لافراااااح
نظرية حلوة لكن تطبيقها اظن انه صعب
لكن بالتاكيد مش مستحيل
تحياتي
السلام عليكم و رحمة الله
ما شاء الله حقيقي هايل يا فندم و الله لو في ايقونة واحد بيصفق كنت حطتها بس اعتبرها وصلت
على فكرة رغم ان الكلام لاول وهلة ممكن يكون بسيط و عادي بس صدقني حضرتك ده كلام بيعمل نهضة
و عموما عجبني الاسلوب السهل في توصيل المعلومة يعني الكلام ده بدرسه في التنمية البشرية انبهرت بطريقة حضرتك في العرض ما شاء الله
ايا كان سواء حضرتك بتهتم بالتنمية البشرية او ده من خلال خبراتك فهو جميل ما شاء الله
موفق دائما ان شاء الله و ما شاء الله فعلا المدونة ممتازة و مختلفة
صحيح السعادة او الحزن قرار
بس معتقدش انه سهل اوى كده انك تدوس ع الزرار
الموضوع بيحتاج شوية مجهود وصبر عشان تنفذ قرارك
ولو الموهبة دى عندك فعلا ..
ربنا يديمها عليك
مدونتك جميلة..خفيفة..ومتفائلة
تحياتى ليك
اعتزلت التدوين
شكرا انكم قبلتوني في عالمكم الفتره
دي
ويشهد الله كم احببتكم فيه
بسم الله
اولا
ازيك ياعمار
يارب تكون دايما بخير
مدونتك حلوة وفكرتها كمان احلي ويارب يجعلها في ميزان حسناتك
الموضوع المرة دى مهم
لان في الوقت الى عايشينه دهوت تلاقي كل الناس حزينه
واحيانا بنكون احنا الى بنحزن نفسنا وبنستمر في تعذيبها
انا مريت بحاله اكتئاب قبل كدة وبجد تعبت جدا بس في يوم دعيت ربنا اوى انو يخفف عنى
وحاولات انى اسعد نفسي بااى طريق
قولت لنفسي طيب ليه افضل كدة وانا مش عاوزة اكون كدة وبايدي انى اكون احسن
وقفت مع نفسي شويه وبجد رجعت تاني سعيدة ومش بفكر ابدا في الحزن دة
ع الرغم انى احيانا بتقابلني مشاكل كتير
بس اقولك اهم حاجه
انك تتغلب فعلا ع نفسك وانتا هتتغلب ع اى حاجه بعد كدة
ومع ذالك مش اى حد فعلا يقدر يعمل كدة
ودة شعب مصر بقه
مين هيفكر في اليوغا قبل مايفكر في الكوسا
يارب تفهمنى
سلامي كتير ليك
صحيح
في مقوله حلوة اوى اكيد اكيد انتا عارفها
ليست الاشياء نفسها هي ماتخيف الانسان وانما افكارة عنها واوهامه بشانها
دى مقوله لابكتيتوس
فيلسوف هو
وبجد معاه حق
يارب تكون فاهمنى
هستنى جديدك
سلام
اهلا بيكم جميعا
والله ردودكم بتسعدنى جد وبتفيدنى جدا
صديقى الجميل مارو.. اهلا بيك
حبيبى حماده زيدان.. دايما كنورنى
ريمان ..انا حاسس ان المدونة دى معمولة ليكى يارب تكونى بتستفيدى منها
حسام يحيى .. انا بحبك ياض
حسن حنفى .. شكرا على مرورك
semsem .. للاسف الامور مش بسيطه زى ما انتى فاكره كده ونورتينى
اسلام .. شكرا على مرورك
بنت الاسلام .. زيارتك بتفرحنى والله
نور جديد .. متشكر جدا يا افندم على الاطراء الجميل ده ودمتم بخير
بسمه ولكن .. انا فعلا قلت فى الاول ان الموضوع مش سهل ده موضوع صعب جداااا
غير معرف .. اهلا بيكى
ولو الشعب المصرى فكر فى اليوغا
اقتصادنا هايبقى زى اقتصاد الصين واحسن وخلينا فى الكوسه احسن ومتشكر جدا ع السؤال عليا وانا الحمد لله تمام وبخير ونروتى المدونة
وسورى ياجماعه اذا كنت جمعت الردود كلها مرة واحده
ودعواااااااااااااتكم
تحياتى
ع
م
ا
ر
إرسال تعليق